අළු බඳුන එංගලන්තයට

Image by Getty Images via Daylife

මේ ඇසළ මාසේ විසි තුන්වැනි ඉරු දිනය එංගලන්ත ක්‍රිකට් වංශ කතාවේ රන් අකුරෙන් ලියැවෙන දවසක් බවට පත් කරන්නට ඇන්ඩෘ ස්ට්‍රාවුස් ප්‍රමුඛ ටෙස්ට් පිල ඕවල් පිටියේ දී සමත් විය. ඕස්ට්‍රේලියානුවන් 2-1 ලෙස පරාජයට පත්කල ඔවුන් නැවත වතාවක් අළු බඳුන දිනා ගත්තේ පසුගිය වර ඕස්ට්‍රේලියාවේ දී ලැබූ 5-0 අමිහිරි පරාජයේ මතකයන් මකා දමමිනි. පිට පිට දෙවරක් තම මවු බිමේ පැවති තරඟාවලි එංගලන්තය ජය ගත් ප්‍රථම අවස්ථාවද මෙයයි.

හයේ හයක්

ක්‍රිකට් ඉතිහාසයේ පළමු වරට ඕවරයක පන්දු හයට හයේ පහර හයක් සර් ගාෆීල්ඩ් සෝබර්ස් ගේ පිත්තෙන් එල්ල වූ ඒ අමරණීය මොහොත.
එවකට එංගලන්තයේ නොටින්හැම්ශයර් කණ්ඩායමේ නායකත්වය දැරූ ඔහු මේ දස්කම දැක්වූයේ ග්ලැමෝගන් පිලට එරෙහිව 1968 වසරේ පැවති පළමු පෙළ තරඟයකදීය.

ඩිල් එක්ස්ප්‍රස්

ටෙස්ට් ආරම්භක පිතිකරුවෙකු ලෙස පලමු වරට ගාල්ලේ දී අද (18-08-2009) පිටියට බට තිලකරත්න ඩිල්ශාන්ට මේ ටෙස්ට් තරඟයක් බව අමතක වී ඇතැයි නරඹන්නන්ට සිතෙන්නට ඇත. සිය 20-20 පිති හරඹ රටාවෙන් නවසීලන්ත පන්දු යවන්නන්ට ගාලු පිටියේ හතර කොනට පහර දුන් ඔහු ශතකයට ලකුණු 8 මෙපිටින් දැවී යන විට 1986-87 තරඟ වාරයේ ඉන්දියාවට එරෙහිව කාන්පූර් වලදී අර්ජුන රණතුංග පන්දු 31 කින් ලබා ගත් ලාංකික පිතිකරුවකුගේ වේගවත්ම අර්ධ ශතක වාර්ථාව තම නමට ලියා ගෙන හමාරය. පන්දු 30 ක දී ලැබූ ඒ අර්ධ ශතකයට තවත් ලකුණු 42 එක්කල ඔහු දැවී යන විට පන්දු 72 කින් ලකුණු 92 ලබා සිටියේය. ගින්නෙන් ජීවත් වෙන්නා ගින්නෙන්ම නසී යන්න සැබෑ කරමින් ඔහුට හිමිවිය යුතුව තිබූ ශතකය අහිමි වූවේ ත් පිට ඉන්නට වැටුන පන්දුවකට වේගවත් පහරක් එල්ල කිරීමට යෑමෙනි.

නවසීලන්තය සමග ටෙස්ට් තරඟාවලිය සඳහා නම්කර ඇති ශ්‍රී ලංකා සංචිතය

කුමාර් සංගක්කාර (නායක), මුත්තයියා මුරලිදරන්, මහේල ජයවර්ධන, තිලකරත්න ඩිල්ශාන්, තිලාන් සමරවීර, අජන්ත මෙන්ඩිස්, චාමර කපුගෙදර, රංගන හේරත්, ප්‍රසන්න ජයවර්ධන, මලින්ද වර්ණපුර, නුවන් කුලසේකර, ඇන්ජලෝ මැතිව්ස්, තරංග පරණවිතාන, තිලාන් තුෂාර,ධම්මික ප්‍රසාද්

පකිස්ථානය සමඟ විස්සයි විස්ස තරඟයෙන් සේරම් ඉවතට

තේරීම් කමිටුවේ තේරුම් ගැනීමට අපහසු තේරීම් ගොන්නට තව එකක් එකතු කරමින් පසුගිය 20-20 ලෝක කුසලාන සංචිතයේ සිටි ඉන්දික ද සේරම් අගෝස්තු 12 පකිස්ථානය සමග පැවැත්වෙන තරඟය සඳහා වූ සංචිතයෙන් හැලී ගොස් ඇත. පසුගිය සංචාරයේ නරඹන්නෙක් පමනක් වූ ඔහු ඊට පෙර පැවති අන්තර් පළාත් 20-20 තරඟාවලියේ දී දැක්වූ දස්කම් මත සංචිතයට සුදුසුකම් ලැබුවේය. දිගින් දිගටම අසාර්ථක වූ සමහර පිතිකරුවන්ට නොවටිනා අවස්ථා ලැබෙද්දී වතුර ඇද්ද සේරම්ට එංගලන්ත සංචාරය නිකම්ම ට්‍රිප් එකක් පමනක් විය. පුහුණු තරඟයක් හැර නිසි අවස්ථාවක් නොලද ඔහු මේ තරඟයෙන් කැපී යන්නේ දස්කම් නොදැක්වූ නිසා විය යුතුය..බංකුව මත සිට ක්‍රිකට් ක්‍රීඩාවේ දස්කම් දක්වන අයුරු දන්නේ අපේ තේරීම් කමිටුවේ මහත්වරුන් පමනි.

අමරණීය මැකෝ

මැල්කම් මාර්ෂල් ක්‍රිකට් පිටියෙන් සමුගත් දා ලොව පුරා පිතිකරුවන් වඩා සුවදායක නින්දක් ලැබුවාට සැක නැත.
සාපේක්ෂව නොඋස් වේග පන්දු යවන්නෙකු වුවත්, ඔහුගේ ජවය හා නිවැරදි ඉලක්කය වසර 19 පුරා දිවගිය පලමු පෙළ ක්‍රිකට් දිවියේ දී ප්‍රතිවාදීන් භීතියට පත් කෙරිනි.
බටහිර ඉන්දීය කොදෙව් දූපත් වලින් බිහිවූ මේ විශිෂ්ඨ පන්දු යවන්නා 1992 වසරේ ක්‍රීඩාවෙන් විශ්‍රාම යන විට ටෙස්ට් තරඟ 81 කට ක්‍රීඩා කර තිබිනි. හැත්තෑව අසූව දශක වල කොදෙව්වන්ගේ සුපිරි සාර්ථකත්වයට ඔහුගේ දායකත්වය ඉමහත් විය.
1958 දී බාබේඩෝස් හි බ්‍රිජ්ටවුන් වල උපත ලැබූ මාර්ෂල්, දූපත් කණ්ඩායම වෙනුවෙන් 1977 වසරේ සහභාගී වූ මංගල පලමු පෙළ තරඟ වාරයේ දී ම තම හැකියාවන් විදහා දැක්විය. ලකුණු 97 කට කඩුලු 7 දවා ගනිමින් ඔහු දැක්වූ දස්කම් ඉන් වසරකට පසු කොදෙව් පිලට දොරටු විවරකර දුන්නේ යන්තම් වයස විස්ස වෙත් දී ය.
එ තැන් සිට ටෙස්ට් කඩුලු 376 ක් විශ්මිත 20.94 ක සාමාන්‍යයකින් ලබා ගන්නා තුරු ඔහු ආපසු නොහැරුනේය. එයට ටෙස්ට් තරඟයක කඩුලු 10 හෝ ඊට වඩා ලබාගත් අවස්ථා 4 ක් සහ ඉණිමක කඩුලු පහක් හෝ ඊට වඩා ලබාගත් අවස්ථා 22 ක් ද ඇතුලත්ය.
උසින් අඩි පහයි අඟල් දහයක් වුවත් මාර්ෂල් සැබවින්ම වේගවත් (genuinely fast) පන්දු යවන්නෙකු විය.ඔහුගේ අතිශය නිවැරදිව එල්ලයට යොමු කරන බවුන්සර් පන්දුවට ලොව පුරා පිතිකරුවන් දැක්වූයේ ඉමහත් භීතියකි. 1986 වසරේ එංගලන්තය හා පැවති එක් දින තරඟයක දී මාර්ෂල් ගේ මේ භයානක බවුන්සර් පන්දුවක් වැදුනු මයික් ගැටින් ගේ නාසය බිඳී ගිය අතර පන්දුව යලි අතට ගත් මාර්ෂල් පිළිකුලෙන් එය පසෙකට විසි කලේ තවමත් එහි රැඳී තිබූ ගැටින්ගේ අස්ථි කොටසක් දැකීමෙනි.
වේගවත් බව මෙන්ම ඔහු නිවැරදි ඉලක්කයට පමාවී සිදුවන දෝලනයකින් (late swing) යුතු පන්දු යැවීමට අති දක්ෂයෙක් විය. මෙය ඔහුගේ අස්වාභාවික පන්දුව ඇල්ලීමේ ක්‍රමයත් (grip) ඔහුටම ආවේනික වූ පන්දු යැවීමේ ඉරියව්වත් නිසා සිදුවූ බව සිතිය හැක.
ජව සම්පන්න ධාවනයකින් විත් ඔහු යවන දෝලනය වන වේග පන්දු වලට මුහුන දීම ලෝකයේ හොඳම පිතිකරුවන්ට පවා බොහෝ විට අපහසු විය.
මාර්ෂල් ප්‍රමුඛ ලොව මෙතෙක් සිටි භයානකම සිව් සාමාජික වේග පන්දු බලඇණිය සහිත කොදෙව්වන් එකල ලොව සිටි අති දක්ෂම ක්‍රිකට් පිල විය.
වසර 1991 එංගලන්තයේ ඔවල් පිටියේ දී ටෙස්ට් තරඟ වලින් සමුගත්තත්, ඊට වසර තුනකට පෙර මාර්ෂල් ඔහුගේ දක්ෂතාවල උපරිම මට්ටමේ විය.
එංගලන්ත පිතිකරුවන් භීතියෙන් මුසපත් කල කොදෙව්වන්ගේ 1988 සංචාරයේ දී ඔහු කඩුලු 35 ලබා ගත්තේ 12.65 ක සාමාන්‍යයක් රඳවා ගනිමිනි. ඕල්ට් ට්‍රැෆර්ඩ් ක්‍රීඩාංගනයේ දී ලකුණු 22 කට ලබාගත් කඩුලු 7 ඔහුගේ දක්ෂතම පන්දු යැවීමයි.
එක්දින කඩුලු 157 ලබා ගත් මාර්ෂල් ඔහුගේ දීර්ඝ ක්‍රීඩා කාලය තුල පලමු පෙළ තරඟ වලට පවා කැපවීමෙන් සහභාගී විය. බාබඩෝස් කණ්ඩායමට සහ දකුණු අප්‍රිකාවේ නටාල් ප්‍රදේශයට ක්‍රීඩා කල ඔහුගේ වර්ණවත් පලමු පෙළ ගෙවුනේ සිය දෙවන නිවහන් වන් එංගලන්ත හැම්ප්ශයර් ප්‍රාන්ත කණ්ඩායමට ක්‍රීඩා කල අවදියේ ය.1982 ප්‍රාන්ත තරඟ වාරයේ කඩුලු 132 ලබා ගනිමින් වැඩිම කඩුලු ලාභියා වූ ඔහු 1986 සහ 1988 වාර වල හොඳම කඩුලු ලබා ගැනීමේ සාමන්‍යට උරුමකම් කීය.
ඔහුගේ ප්‍රාන්ත තරඟ දිවියේ කිරුළු පළන් මොහොත එලැඹ්යේ ටෙස්ට් පිටියෙන් සමුගෙන වසරකට පසු 1992 වසරේ ලෝඩ්ස් පිටියේ දී හැම්ප්ශයර් කණ්ඩායම සමඟ බෙන්සන් සහ හෙජස් කුසලානය දිනා ගැනීමෙනි.
පන්දු යවන්නෙක්ම පමනක් නොවූ මාර්ෂල් සෑහෙන හැකියාවක් පෙන්වූ පිතිකරුවෙක්, සහ පසු කාලයේ හැම්ප්ශයර්, කොදෙව් හා නටාල් කණ්ඩායම් වල පුහුණුකරුවෙක් ද විය. නටාල් කණ්ඩායමේ ඔහු පුහුණු කරන අවදියේ තරුණ වේග පන්දු යවන්නන්ට තම අත්දැකීම් බෙදා දුන් ඔහු පසු කාලීනව දකුණු අප්‍රිකානු කණ්ඩායෙමේ සුපිරි තරුවක් වූ තරුණ ශෝන් පොලොක් ට පන්දු යැවීම ගැන උනන්දුවක් ඇතිකිරීමට හේතු විය. අදත් පොලොක් තම සාර්ථකත්වයට මාර්ෂල්ගෙන් ලද ගුරුහරු කම් මහත් සේ අගය කරයි.
පලමු පෙළ ලකුණු 11,000 කට වඩා රැස් කර ඇති ඔහුගේ ලකුණු ලබා ගැනීමේ සාමාන්‍යය 25 කට ආසන්න වන අතර ඊට ශතක හයක් ද ඇතුලත් ය.
පිතිකරුවකු ලෙස ඔහුගේ ප්‍රකටම වීර ක්‍රියාව සිදුවූ යේ 1984 වසරේ හෙඩිංග්ලි පිටියේ දී සිය මහපටැඟිල්ල බිඳුන තරඟයේ දී ය. මේ සිදුවීමෙන් පසු ක්‍රීඩා ගාරයට ගිය මාර්ෂල් යලි අවසන් පිතිකරු ලෙස පිටියට පැමින තනි අතින් පන්දුවට පහර දෙමින් ලැරී ගෝම්ස් ට ශතකය ලබා ගැනීමට උපකාර විය. පසුව වම් අතේ වෙලුම් සහිතව තුවාල ලත් කොටියකු සිහිකරමින් පන්දු යැවූ ඔහු එංගලන්ත ඉණිම සුණුවිසුණු කර දැම්මේ ලකුණු 53 කට කඩුලු 7 ලබා ගැනීමෙනි.
ලොව මෙතෙක් බිහිවූ සුපිරිතම වේග පන්දු යවන්නා කවුරුන් ද යන්න ගැන නොයෙකුත් විවාදයන් තිබුනත්, ඔහුගේ විස්මිත කඩුලු ලබා ගැනීමේ සාමාන්‍යයත් එකල දක්ෂතම ප්‍රතිවාදීන්ට එරෙහිව දක්වා ඇති දස්කම් සහ වේග පන්දු යවන්නන්ට වාසි දායක නොවන දකුණු ආසියානු කලාපයේ දක්වා ඇති දක්ෂතා ආදිය අනුව මැල්කම් මාර්ෂල් යනු ලොව මෙතෙක් පහල වූ අති ශූර වේග පන්දු යවන්නා බව බොහෝ දෙනෙක් පිළිගන්නා කරුණකි.
දක්ෂ ක්‍රීඩකයෙකු පමනක් නොව පිටියේ දී වැදගත් මහත්මයෙකු වූ මාර්ෂල් ප්‍රතිවාදී පිළේ ක්‍රීඩකයන් ගේ පවා ගෞරවයට ලක්විය. සැහැල්ලු ප්‍රියමනාප බවකින් පිටියේ හැසිරුන , සුන්දර සිනහවකින් යුත් මේ ශ්‍රේෂ්ඨයා තමා කරන කාර්යයට සියයට සියයකින් කැපවූ අතර අන් අයගෙන් ද එබඳු කැපවීමක් බලාපොරොත්තු විය. මේ හේතුව නිසාම වන්නට දෝ ඔහු පසුකාලීනව කැපවීම අතින් අඩු ක්‍රීඩකයන් සහිත කොදෙව් පිලේ පුහුණුකරු ලෙස ගෙවුවේ එතරම් සුන්දර කාලයක් නොවේ.
කල් ගතවී හඳුනා ගත් මහ බඩවැලේ පිළිකාවකින් වසර 1999 නොවැම්බර් මස හතර වැනි දා සුවහසක් ක්‍රීඩා ලෝලීන්ගේ නෙත් කඳුලින් පුරවමින් මියයන විට ඔහු හතළිස් එක් හැවිරිදි වියේ පසුවූ එක් දරු පියෙකු විය.
කෙටි ජීවිත කාලයක් තුල සදා නොමියෙන මතකයක් ලොවට එක් කල මැල්කම් ඩෙන්සිල් මාර්ෂල්, හිතවතුන් සහ රසිකයන් ට නම් ආදරණීය මැකෝ, ඔබ සදා අමරණීයයි......

ක්‍රිකට් ලොවේ දොන්...

ක්‍රිකට් ලෝකයේ මෙතෙක් පහල වූ අති විශිෂ්ඨතම පිතිකරුවා ලෙස අවිවාදයෙන් හැඳින් වෙන සර් ඩොනල්ඩ් ජෝර්ජ් බ්‍රැඩ්මන් වඩා ප්‍රකටව හැඳින්වෙන්නේ දොන් බ්‍රැඩ්මන් ලෙසිනි. ඔහුගේ ලකුණු ලබාගැනීමේ සාමාන්‍ය වන 99.94 හැඳින්වෙන්නේ ලොව ප්‍රධාන පෙලේ ක්‍රීඩාවක දී ක්‍රීඩකයෙකුගේ ඉහලම දස්කම ලෙසිනි. ක්‍රිකට් ලොව මතු නොව මුලු ක්‍රීඩා ලෝකයේම පුරාවෘතයක් බවට පත්වී ඇති ඔහු ගැන මේ පල වන්නේ විස්තරාත්මක සටහනක් නොව 1996 මාර්තු 29 වැනි දින ඕස්ට්‍රේලියානු රූපවාහිනී නාලිකාවක් සඳහා රේ මාටින් විසින් සර් ඩොනල්ඩ් බ්‍රැඩ්මන් සමඟ පැවැත්වූ සාකච්ඡාවකින් උපුටා ගත් කොටසකි.

රේ:සර් ඩොනල්ඩ්, ස්තුතියි මා සමඟ කතා බහකට ඔබේ වටිනා කාලය මිඩංගු කිරීම ගැන

දොන්: ඒක සතුටක්.

රේ:මේ අවුරුදු 30 ක කාලයේ රජ කුමරියන්, ජනාධිපතිවරුන්, අගමැතිවරුන් සමඟ සම්මුඛ සාකච්ඡා පවත්වා තිබුනත් මට යම් අපහසුවක් දැනෙනවා

දොන්:මම හිතන්නෙ නැහැ.ඔබට නොවේ මටයි දෙගිඩියාවක් දැනෙන්නෙ.

රේ:නමුත් ඔබට තවමත් හැඟෙනවද ඔබට ගෞරවයක් පමනක් නොවෙයි, ගැඹුරු ආදරයක් ඕස්ට්‍රේලියාව තුල ඇති බව ?

දොන්:නැහැ නැහැ.මම ඒ දිහා ඔය විදියට බලන්නෙ නැහැ.මම සාමාන්‍ය මනුෂ්‍යයෙක් විතරයි.

රේ:ඒ නිසා ද ඔබ සෑහෙන්න කාලයකින් කිසිවෙකු සමඟ කථා කර නැත්තේ ?

දොන්:ඕ..මම බොහෝ දෙනෙකු සමඟ කථා කර තිබෙනවා. හැබැයි ප්‍රසිද්ධියේ නොවෙයි.මම කිසිදු ආකාරයක ප්‍රසිද්ධියට කැමති නැහැ. කැමති වෙලා හිටියෙත් නැහැ.වයසට යන්න යන්න අඩු ප්‍රසිද්ධියට මම කැමතියි

රේ:ඇත්තටම ඒක පුදුමයි.ඔබේ පරම්පරාවේ ඕස්ට්‍රේලියානුවන් කවරෙකුටත් වඩා ප්‍රසිද්ධියක් ඔබට ලැබුනා.

දොන්: සමහරවිට වෙන්න ඇති. නමුත් ඒ මට එය වුවමනා වූ නිසා නොවෙයි.
රේ::කොහොම ද රසිකයන් ගෙන් එන ලියුම්. ඔබට කොපමන විතර තවමත් ලැබෙනව ද?

දොන්: ම්..මම හිතන්නෙ මට දැන් ලියුම් එනව අන් කවරදාටත් වඩා.සමහරවිට 1948 විශිෂ්ඨ එංගලන්ත සංචාර සමයේ හැරුන විට. සාමාන්‍යයෙන් දවසකට පැය හතරක් පමන මම ගත කරන්නෙ ලියුම් වලට පිළිතුරු යවන්න.

රේ:ලෝකයේ සෑම තැනකින් ම වගේ ?

දොන්: ඔවු. ලෝකෙ වටෙන් ම. වැඩිපුරම ඕස්ට්‍රේලියාවෙන්.නමුත් සෑහෙන්න ප්‍රමාණයක් ඉන්දියාවෙන් සහ එංගලන්තයෙනුත්

රේ:සර් දොන්..ඔබ කලක් ලෝක වාර්ථාව වුනු ලකුණු 334 ලබා ගත්තේ මේ පිත්තෙන් (පිත්ත ඔසවා පෙන්වයි )නමුත් ඔබ එය ඔබේ හොඳම ඉණිම ලෙස සලකන්නේ නැහැ ?

දොන්: තාක්ෂණික අතින් නැහැ. මොකද මගේ අතින් වැරදි කිහිපයක් වුනා ඒ ඉණිමේදී.

රේ:(සිනහසෙමින්) මොන වගේ වැරදි ද ?

දොන්: මෙහෙමයි. ඔබ කවර් හරහා එල්ල කරන පහර තර්ඩ් මෑන් වෙත ගියොත් එය වරදක්. එය යන්නේ ඔබ අදහස් කරන තැනට නොවෙයි.

රේ: නමුත් ඔබ ශතකය වාර්තා කලා දිවා ආහාරයට පෙර.තේ පානයට පෙර ද්විත්ව ශතකය.ලකුණු 309 දිනය නිමාවනවිට.

දොන්: ඔවු මම දන්නවා. ඒ අවසන් ප්‍රතිඵලය.නමුත් මම වඩා හොඳ ඉණිමක් ක්‍රීඩා කළා 1930 ලෝඩ්ස් පිටියේ දී.ලකුණු 254 ලබාගත් ඒ ඉණිමේ දී හැම පහරකින්ම පන්දුව මට උවමනා කරන තැනටම ගියා..මා දැවීගිය පන්දුව හැර.

රේ: ඔබ කඩුළු රකින්නා අතට උඩ පන්දු ලබා දී දැවී ගියේ ඉතාම කලාතුරකින්. නූතන ක්‍රිකට් සමග බලන විට මෙයට හේතුව කුමක් ද?

දොන්:මෙහෙමයි. ඒක මගේ තාක්ෂණයේ තිබුන වෙනසක් බොහෝ නූතන ක්‍රීඩකයන් සමඟ බලනවිට. අමතක කරන්න එපා මම ඔබට කිවුවා මට ක්‍රමාණුකුල පුහුණුවක් ලැබුනෙ නැති බව. මම මගේ ම ක්‍රමයක් සොයා ගත්තා. එයට කියන්න පුලුවන් "close bat" ක්‍රමය කියල. මම එයින් අදහස් කරන්නෙ, මට පන්දුවට එන දිශාවට ක්‍රීඩා කරන්න පුලුවන් එයින් පිත්තේ මුහුනත හැරවීමෙන්. මම පිට ඉන්න දෙසට යම්න් තමයි මෙය කරන්නෙ. බොහෝ නූතන ක්‍රීඩකයන්ට පුහුණු කරන්නේ පිත්තේ මුහුනත සම්පූර්ණයෙන් ම කෙලින් (පන්දුයවන්නා දෙසට මුහුනත යොමා ) තබා ගන්නට, පිත්ත පන්දුව එන දෙසට ගෙන යා හැකි සේ (straight)
ඔවුන් එ සේ පිත්ත තබා ගත්තත් ..මට මෙන් ඔවුන්ට පන්දුව දෙසට පිත්ත ගෙනයාම අපහසු බව පෙනනව.එපමනක් නොවෙයි, පන්දුව ඔවුන්ගෙන් ඉවතට දෝලනය වනවිට ඔවුන් පිත්ත හැරවීමට පෙළඹෙන බව දකින්න පුළුවන්. පන්දුව පොයින්ට් හා ගලී දෙසට යොමු කිරීමට මෙන්. මේ නිසා මා කළ ආකාරයට වඩා මෙහි දී පිත්තේ දාරය නිරාවරණය වීමක් සිදුවෙනවා.මීට අමතරව මම හිතනවා ඔවුන් අද භාවිතා කරන බරින් වැඩි පිති නිසාත් යම් බලපෑමක් ඇති කියල.ඔබට බරින් වැඩි පිත්තකින් කෙලින් පහරවල් එල්ල කල හැකි වුවත්, හරහට පහරවල් එල්ල කිරීම අපහසුයි. ඒ නිසා ඔවුන් කම්මැලි ස්වභාවයකින් පහරට යන බවක් පේනව.

රේ:(බ්‍රැඩ්මන් පන්දුවට පහර දෙන ඡායාරූපයක් පෙන්වමින්) නමුත් මෙයයි ඔබේ රටාව. හරියට ගොල්ෆ් පහරක් වගෙයි.

දොන්: ඔවු..මෙහෙමයි.. පහරේ අවසානය ගොල්ෆ් පහරක් වගේම තමයි.

රේ: එහෙනම් ඇයි අද විශිෂ්ඨ ක්‍රීඩකයන් ගෙන් අපි මෙය දකින්නෙ නැත්තේ ?

දොන්:මම හිතන්නේ ඔවුන්ට පුහුණුකරනවා එය නොකරන්න.ඔවුන්ට උපදෙස් ලැබෙන්නේ වම් මැණික් කටුව පිත්තේ මිටට ඉදිරියෙන් තබා ගෙන පිත්තේ මුහුනත කෙලින් තබා ගන්නට

රේ:නමුත් මේ ක්‍රීඩකයන් තමයි ලෝකයේ සිටින හොඳම ක්‍රීඩකයන් ?

දොන්: සත්තකින්ම..මෙහෙමයි අප මේ කතා කරන අය ඉතා හොඳ ක්‍රීඩකයන්. එය තාක්ෂණයේ ඇති වෙනසක් පමනයි.

රේ: සර් ඩොනල්ඩ්, ඔබ ඔවුන්ට දෙන උපදෙස කුමක් ද?

දොන්: සැහැල්ලු පිත්තක් භාවිතා කරන්න කියලයි මම කියන්නෙ. රාත්තල් තුනක් පමන බර පිත්තක් ඇත්තටම බර වැඩියි. ඔබ ක්ලයිව් ලොයිඩ් වැනි ශක්තිමත් වැඩුනු සිරුරක් ඇති අයෙක් නම් මිස . සාමාන්‍ය ක්‍රීඩකයෙකුට රාත්තල් 2 අවුන්ස 6 හෝ 7 බර පිත්තක් හොඳට ගැලපෙනව.

රේ: හොඳයි. ඒ පිත්ත හිස පිටුපසින් මේ විදියට ඉහලට ගන්න ? (පින්තූරය පෙන්වමින්)

දොන්: පිත්ත ඒ විදියට ගන්න වෙනස් රටාවකට, තාක්ෂණයකට පුහුණුකල යුතුයි.

රේ: ඔබ ඒ සඳහා සූදානම් ද?

දොන්: ඇත්තෙන්ම නැහැ..ඒ කාලෙ ගියා (දෙදෙනාම සිනහසෙති )

රේ:ඉතින් ඔබ පලමුවෙන් ම ශෙෆීල්ඩ් ශීල්ඩ් පලමු පෙල ක්‍රීඩා කරන්න පටන් ගත් අවදියේ, කොපමන වැටුපක් ලැබුනා ද ?

දොන්: ඒ කාලෙ..මම හිතන්නෙ මම ශෙෆීල්ඩ් පටන් ගන්න විට දවසකට අපට සිලින් දහයක් ගෙවුව. ඒ කියන්නෙ ඩොලර් එකක් සහ අපේ නවාතැන් පහසුකම්.

රේ: ටෙස්ට් තරඟ වලට ?

දොන්: ටෙස්ට් තරඟ වලට මම හිතන්නෙ අපට තරඟයකට පවුම් 25, ඩොලර් 50 ගෙවුව.ඒ මුළු තරඟයටම කොපමන දින ගනනක් වුවත්. ඒ කාලෙ අපි තරඟ අවසානයටම ක්‍රීඩා කලා. මට මතකයි සමහර තරඟ දින අටක් ක්‍රීඩා කල. ඉරිදා විවේක දිනයත් සමඟ දින නවයක්.

රේ: නමුත් පවුම් 600 ක් එංගලන්ත සංචාරයට පමනක්. එය හොඳ ගානක් ?

දොන්: ඕ..ඇත්තෙන්ම එය හොඳ ගානක්..නමුත් එය සංචාරය නිසා කෙනෙකුගේ අහිමිවන වැටුප ආවරණය කලයුතු වුනා.

රේ: මුළු සංචාරයම මාස හයක් ? මාස හතක්?

දොන්: අපෝ නැහැ..මාස අටක්.අපි මුලින්ම තස්මේනියාවට ගිහින් ක්‍රීඩා කරනව සති හයක් පමන. පෙබරවාරි අග නැත්තම් මාර්තු මුල පිටත් වෙලා ආපහු එන්නෙ නොවැම්බර් වල..ඔක්කොම මාස අටක්.

රේ: ශේන් වෝන් ගේ එහෙමත් නැත්තම් සච්න් ටෙන්ඩුල්කාර් ගේ ඩොලර් මිලියන ගණනක කොන්ත්‍රාතු ගැන කියවන විට..ඔබ විශ්මයට පත්වෙනවා ද ..නැතිනම් ඒ මේ කාලයේ හැටි ද?

දොන්: සත්තකින්ම එය කාලයේ වෙනස. නමුත් අමතක කරන්න එපා මම ක්‍රීඩා කරන කාලයේ අපි හැමෝම නවකයෝ.ඕස්ට්‍රේලියාව නවකයින්. අපි රැකියාවට නොවෙයි ක්‍රීඩා කලේ ක්‍රිකට් වලට ඇති ආදරය නිසා.

රේ: හොඳයි ඔබ පළමු පෙළ හෝ ටෙස්ට් තරඟයකට පෙර කුමක් ද කලේ? උදෑසන වැඩට ගිහින් පසුව ක්‍රීඩාංගනයට ?

දොන්: ඇඩිලේඩ් වලදි ඔව්. මට එහි මගේම ව්‍යාපාරයක් තිබුන කාලයේ.මම උදේ හතට වැඩට ගිහින් පැයක් දෙකක් එහි ඉඳල තමයි පිටියට යන්නෙ. ආපසු තරඟයෙන් පසුත් ඇවිත් එකොළහ විතර වෙනකම් වැඩ කරනව. මට එය කල යුතු වුනා ක්‍රීඩාව හා රැකියාව සමබරව ගෙන යන්න.

රේ:පසු දා යලි පැමින ලකුණු රැස් කරන්නත් ?

දොන්: ඔව්..අඩු ගානෙ එයට උත්සාහ කරන්න.

රේ: ඇයි ඔබ 1930 දි එංගලන්තයට ගොස් වෘත්තීය ක්‍රීඩකයෙක් වෙන්න හිතුවෙ නැත්තෙ?

දොන්: ඒ මට වෘත්තීය ක්‍රීඩකයෙක් වෙන්න වුවමනාවක් නොතිබුන නිසා. මම ක්‍රීඩා කලේ ජීවත් වෙන්න නොවෙයි..එයට ඇති ආදරය නිසා.මට හිතෙනව මම වෘත්තීය ක්‍රීඩකයෙක් වුනා නම් ක්‍රිකට් වලින් ලද වින්දනය නැති වෙන්න ඉඩ තිබුන කියල.

රේ: කුමක් ද ඔබේ සීමාව වුනේ? ඔබට වුවමනා වුනේ නැහැ ක්‍රිකට් රැකියාවට බාධාවක් කරගන්න ?

දොන්: ඔබට කැමතිනම් එහෙම කියන්න පුලුවන්. නමුත් මට වුවමනා වුනේ ක්‍රිකට් වලට කිසිම සම්බන්ධයක් නැති රැකියාවක් කරන්න.නමුත් මට ක්‍රීඩාවට සම්බන්ධ රැකියාවක් කරන්න සිදුවුනා ආර්ථික අවපාත සමයේ.ඒ මට ජීවත්වීම සඳහා කුමක් හෝ කිරීමට සිදුවූ නිසා. මම අකමැත්තෙන් කළ දෙයක් එය. ඒ නිසා අවස්ථාව පැමිණි විගසම මම දකුණු ඕස්ට්‍රේලියාවට පැමිණියා කොටස් තැරැවුකරුවකු ලෙස.

රේ: නමුත් වරක් ඔබ ලැන්කශයර් ලීගයට ක්‍රීඩා කිරීම ගැන කල්පනා කලා?

දොන්: ඒ කාලයේ මට කිසිම තැනක වෙනත් රැකියාවක් සොයාගත නොහැකිවූ නිසා තමයි ඒ

රේ: හොඳයි සර් ඩොනල්ඩ්...අපි චෝදනා කල යුතුයි නියම වැරදි කරුවන්ට..බොඩිලයින් සම්පූර්ණයෙන්ම ඔබේ වරද ?

දොන්:එහෙමද ? (සිනහසෙයි )

රේ: ඔබට තමයි චෝදනාව එන්නේ..ඔවුන් ඔබයි ඉලක්ක කලේ.

දොන්: මෙහෙමයි..ඉතිහාසය එහෙම අදහස් කරනව..එහෙම නේද?

රේ: ඔබේ පොතේ ඔබ කියනව..බොඩිලයින් පන්දු යැවීමේ භයානක කම ඔබ කිසිදාක තේරුම් ගන්නෙ නැහැ කියල ..ඔබම එයට මුහුන නොදුන්නා නම්..කියන්න එහි ඇති භයානක කම.

දොන්: මෙහෙමයි..ක්‍රිකට් පන්දුවක හැඩය ඇති අවුන්ස පහමාරක් හයක් බර පුංච් මිසයිලයක් පැයට සැතපුම් අසූවක, අනූවක වේගයෙන් ඔබ දෙසට එනව.එය පන්දු යවන්නාගෙ අතින් ගිලිහිලා ඔබ වෙත එන්න යන කාලය තත්පරයෙන් හතෙන් පංගුවක් පමන.මේ කාලය ඇතුලත ඔබ පන්දුව එන මාවත තෝරා ගන්න ඕන.පන්දුව පතිත වන තැන හඳුනා ගන්න ඕන..බොහෝවිට පන්දුවේ ඉපිලීම ඒකාකාරී නැහැ.ඉතින් එය යම් තැනක පතිත වුනොත්...සමහර විට එය පපුව මට්ටමට එන්න පුලුවන්..නැතිනම් හිස මට්ටමට ..එහෙමත් නැතිනම් හිසට උඩින් යන්නත් පුලුවන්.ඉතින් මේ සුලු කාලය ඇතුලත..ඔබ තීරණය කරන්න ඕන එක්කෝ මේ පන්දුවෙන් ලකුණු ලබා ගන්න.නැතිනම් ආරක්ශාකාරී පහරක් එල්ල කරන්න. එහෙමත් නැත්තම් පන්දුව එන මාවතෙන් ඉවත් වෙන්න.ඉතින් මෙය සෑහෙන්න විශාල කාර්යයක්..ඔබ වෛද්‍යවරයෙක් ගෙන් විමසුවොත් කියාවි තත්පරයෙන් හතෙන් පංගුවකදී ඔබට කළ හැකි දේ..මෙබඳු තත්වයක් යටතේ එය සෑහෙන්න අමාරු වැඩක්.හිස් ආවරණ නොතිබුන..පරණ පන්නයේ පා ආවරණ ආදිය තිබුන ඒ යුගයේ ක්‍රීඩකයන්ට එය ඉතාමත් අනතුරුදායක වුනා.

රේ: ඔබට කිසියම් පපු ආවරණ ආදිය තිබුනා ද ?

දොන්: රබර් ආවරණයක් තිබුනා පපුවට..තව කළව ආවරණයක්..වෙන කිසිවක් නැහැ.

රේ: ඔබට සිතුන ද කිසිවෙකු හෝ මිය යයි කියල?

දොන්:ම්ම්..මම හිතන්නෙ නැහැ මම එච්චර දෙයක් බලාපොරොත්තු වුනා කියල. නමුත් මම නිසැකවම සිතුව දරුණු තුවාල වෙන්න පුලුවන් කියල..ඇත්තටම එහෙම වුනා.බොහෝ අවස්ථා වල පිතිකරුවන් පන්දුව නොවැදී බේරුනේ කෙස් ගහෙන්.

රේ: ඇඩිලේඩ් පිටියේ දී නායක වූඩ්ෆුල් ට පන්දුව වැදුනා.ඉන් පසු ඔල්ඩ්ෆීල්ඩ්ට..ඔබ බලාපොරොත්තු වුනා ද මේ අවස්ථාවේ යම් කැරලිකාර තත්වයක් ඇති වෙයි කියා? එහෙම තත්වයක් තිබුන ද?

දොන්:අපි බැරෑරුම් ලෙස කල්පනා කලා කොයි මොහොතක හෝ එහෙම තත්වයක් ඇතිවේවි කියල..ක්‍රීඩකයන් තුවාල වීමේ අවදානම නිසා නරඹන්නන් හිටියෙ නොසතුටෙන්

රේ: පසුව ඕස්ට්‍රේලියානු නායකයා එංගලන්ත කළමණාකරුට පවසා තිබුනා මෙහි කණ්ඩායම් දෙකක් සිටියත් ක්‍රිකට් ක්‍රීඩා කරන්නෙ එක පිලක් පමනයි කියා.

දොන්: එහෙම තමයි කතාව තියෙන්නේ.මට අහන්න ලැබුනෙත් එහෙමයි.මම දන්න තරමින් ඔවුන් දෙදෙනා පමනයි ඒ වෙලාවෙ එහි සිටියේ..(ක්‍රීඩාගාරයේ)

රේ:පසුව එය මාධ්‍ය වෙත ගියා ?

දොන්: ඔව්..එය පසුව මාධ්‍ය වෙත ගියා..මම දන්නෙ නැහැ කාගෙන් ද කියල..චෝදනාව ආවෙ මට..නමුත් මම නොවේ එය කලේ.

රේ:හොඳයි.නමුත් ඔබටත් එ ලෙස සිතුනද ? එක කණ්ඩායමක් පමනයි ක්‍රිකට් ක්‍රීඩා කරන්නෙ කියල ?

දොන්: මෙහෙම කියමු.අපි වෙනස් ආකාරයක ක්‍රිකට් සෙල්ලමක් කලේ.

රේ: ඔබගේ හොඳ මිතුරකු වූ ගබි ඇලන්ට, සහ අනෙකුත් සුහද එංගලන්ත ක්‍රීඩකයන්ට ඔබ මොනවද කිවුවේ ?

දොන්: ගබි ඇලන් එයට විරුද්ධ වුනා. ඔහුට ඩග්ලස් ජාඩින් බොඩිලයින් පන්දු යවන්න කී විට ඔහු එය ප්‍රතික්ශේප කලා. ඔහු කීවා මම ඒ වගේ පන්දු යවන්නේ නැහැ ඔබට වුවමනා නම් මාව කෙලින්ම ඊලඟ බෝට්ටුවෙන් එංගලන්තයට යවන්න. හැබැයි ඔබ එහෙම කලොත් මම කෙලින්ම MCC මූලස්ථානයට ගිහින් මෙහි සිදුවන දේවල් වාර්ථා කරනව කියල.ඩග්ලස් ඒක වැඩි දුර ගෙනිච්චෙ නැහැ..ගබිට එහෙම පන්දු යවන්න කිවුවෙත් නැහැ.

රේ: ලාවුඩ් පවසා තිබුනා 1930 තරඟ වාරයේ එංගලන්තයේදී කෙටි පන්දු වලට ඔබ දැක්වූ දුර්වලතාවය මෙවැනි උපායක් කරා යොමුවීමට හේතු වූ බව

දොන්: ආ ඔව්..නමුත් එය වැරදියි. ඔය කියන තරඟයේ දී මම ලකුණු 200 කට වඩා ලබා ගත්තා. දැවී ගියේත් ශර්ට් අතේ ගෑවී පිත්තේ වැදුන පන්දුවකින්.මට දෙන්න තියන හොඳම පිළිතුර තමයි ඒ වගේ තෙත විකට්ටුවක ලකුණු දෙසීයකට වඩා ගනිද්දී කෙටිපන්දුවලට ඇඹරෙන්න වෙලාවක් තිබුනෙ නැහැ.

රේ: වාර්ථා වලට අනුව ඔබට සහ ආචි ජැක්සන්ට දරුණු තැලුම් සිදුවී තිබුනා පන්දුව වැදීමෙන්.

දොන්: ඔව්. එදා පත්තරවල ගිය ජායාරූප බැලුවොත් මෙය පේනව..විශේෂයෙන්ම ජැක්සන්ගේ.

රේ:ඉතින් ඔබ ඩග්ලස් ජාඩින් ට මොනවද කිව්වේ?

දොන්: මුකුත් නැහැ..ඔහුට කතා කලේ නැහැ.

රේ: වචනයක් වත්?

දොන්: නැහැ.

රේ: එතකොට තරඟයෙන් පස්සෙවත් ?

දොන්: නැහැ..මතක විදියට ඔහු සමඟ වචනයක් වත් කතා කලේ නැහැ..සංචාරය පුරාවටම.

රේ: එතකොට ලාවුඩ්?

දොන්: නැහැ.මම හැරල්ඩ් එක්කත් කතා කලේ නැහැ. අපි ඒ කාලෙ සාමාන්‍යයෙන් කරන විදියට ක්‍රීඩාගාරයෙදි සුහද වුනේ නැහැ

රේ: ඇයි ඒ..? තිබුන අප්‍රසන්න තත්වය නිසා ද?

දොන්:( අනුමත කරමින් හිස වනයි )

රේ: මේ එකම අවස්ථාව ද ඔබ ප්‍රතිවාදී ක්‍රීඩකයන් හා සුහද නොවුනු?

දොන්: සත්තකින්ම.එකම අවස්ථාව..එකම තරඟ වාරය.

රේ: එම උපක්‍රමය නිසා පරාජය ලැබීම කෙරෙහි ඔබ වෛර කලා ද?

දොන්: වෛරය කියන එක සාමාන්‍යයෙන් මගේ ශබ්දකෝෂයේ නැහැ..එපමන දරුණු විදියට නොවේ..නමුත් සත්තකින්ම මම අකමැතිවුනා එලෙස පරදින්න.

රේ: හොඳයි ඔබ ඒ ගැන කියවන විට, ඔබ එංගලන්ත්යේ දී රැස්කල විශාල ලකුණු ප්‍රමාණයන් නිසා..ඩග්ලස් ජාඩීන් මෙවැනි උපක්‍රමයක් ගෙන ආවා ඔබව නවත්වන්නට.

දොන්: ඔහු එහෙම කරන්න ගිහින් අනෙක් හැමෝම නැවැත්තුවා.

රේ: සර් ඩොනල්ඩ්..නූතන ක්‍රිකට් වල සංවරය හා සමහර ක්‍රීඩකයන් ගේ ආක්‍රමණශීලී බව ගැන කථා කලොත්..ඔබට කවදා හරි හිතුනද ඔබ දැවීගිය විට කඩුල්ලට පහර දෙන්න?

දොන්: මට එහෙම හිතෙන්න ඇති..නමුත් මම කවදාවත් එහෙම කරල නැහැ.

රේ:ඇයි ඔබ එහෙම නොකලේ

දොන්: ඇත්තටම මම එහෙම කලේ එකවරක් පමනයි..ඒ ඉන්දියානුවන් ගේ 1947-8 සංචාරයේ දී..

රේ :නමුත් එය අත්වැරදීමක්?

දොන්: ඔව් එය අත්වැරදීමක්.මම එයින් දැවී ගියා.නමුත් මෙය සම්පූර්ණයෙන්ම තමන් ගේ මනස පාලනය කරගැනීම පිළිබඳ ප්‍රශ්ණයක්.දුර්වල ලෙස කරන අත්වැරැද්දකින් දැවීගිය විට කණස්සල්ලට පත්වීම ස්වාභාවික දෙයක්. නමුත් තමන් ව පාලනය කරගත යුතුයි

රේ: sledging(පිතිකරුට නොයෙක් දේ කීම )ගැන කුමක්ද ඔබ හිතන්නේ?


දොන්: මම ක්‍රීඩා කල කිසිම නායකයෙකු යටතේ වත් , මගේ නායකත්වය යටතේවත් එය සිදුනොවූ බව මට කිව හැකියි.ඒ නායකයන් එයට අවසර නුදුන් නිසා. මගේ නායක්ත්වය යටතේ එය කවරෙකු හෝ කලා නම් මම පලමුව අවවාද කරනවා..යලිත් කරනවා නම් ..ඔහුව කණ්ඩායමට තෝරා නොගැනීමට වග බලා ගන්නවා.

රේ: හොඳයි ..අත යටින් පන්දු යැවීම (underarm) ගැන? නීතියට අනුකූල වුවත් ක්‍රිකට් නොවේ ?

දොන්: ( සිනහසෙයි ) තවමත් ක්‍රිකට් නීති අනුව ඔබට අත යටින් පන්දු යැවිය හැකියි, විනිසුරුට කලින් දැන්වීමෙන්..නමුත් එය සාමාන්‍යයෙන් කරන දෙයක් නොවෙයි, එක ප්‍රකට අවස්ථාවක හැර..ඒ ගැනත් කථා නොකර සිටීම වඩා හොඳයි.

රේ:නමුත් ඒ සිදුවීම ගැන ඔබ කුමක් ද සිතුවේ? එය ඔබ තිගැස්මකට ලක් කලා ද?

දොන්: ඔව්..මම කිසිසේත්ම එය රසවින්ඳේ නම් නැහැ.

රේ:මොකද හිතන්නේ අල්ලස් ගැන? ඔබ කවදාවත් අසා තිබුනාද ඒ ගැන?

දොන්: කවදාවත් නැහැ

රේ: එංගලන්තයේ එ කල ක්‍රිකට් වලට ඔට්ටු ඇල්ලුවත් ?

දොන්: නැහැ මම කවදාවත් අසා තිබුනේ නැහැ..මගේ දැනුමට එහෙම දෙයක් අසුවුනේත් නැහැ.

රේ: ඔවුන් කාට හෝ අල්ලස් දෙන්නට සැරසුනා නම් ඒ ඔබ වෙන්න තිබුනා..ඔබේ සුපිරි තත්වය නිසා..

දොන්: මට ඔබට සහතික කර කියන්න පුලුවන් කිසිවෙකු හෝ මට අල්ලස් දෙන්නට උත්සාහ නොකළ වග.

රේ: ඔබ මුහුණ දුන් වේගවත්ම පන්දු යවන්නා හැරල්ඩ් ලාවුඩ් ද ?

දොන්: නැහැ ඔහු නොවෙයි..ඔහුගේ දස්කම් උපරිම කාලයේ ඔහු සෑහෙන්න වේගවත්..සෑහෙන්න දක්ෂයි.නමුත් මා දුටු වේගවත්ම පන්දු යවන්නා ෆරෑන්ක් ටයිසන්. ඔහු ලාවුඩ් තරම් දක්ෂයෙක් නොවෙයි.නමුත් අසාමාන්‍ය ලෙස වේගවත්.

රේ: ඔබ සිතන විදියට හොඳම වේග පන්දු යවන්නා කවුද?

දොන්: මම අකමැතියි එක්කෙනෙක් පමනක් තෝරා ගන්න.නමුත් මම හිතනව සමහර විට ඩෙනිස් ලිලී ගේ වාර්ථා ඉතා ඉහලයි..නමුත් ඒ මට්ටමේ ම කීප දෙනෙක් සිටියා.

රේ: හොඳයි මම ඇහුවොත් හොඳම පිතිකරුවා ?

දොන්: මම එයටත් පිළිතුරක් දෙන්නේ නැහැ.එක සමාන දක්ෂතා ඇති පිතිකරුවන් බොහෝ දෙනෙක් ඉන්නවා.ඔබ ඇසුවොත් කවුද හොඳම කියලා..මම පටන් ගන්නම් ..ජෝර්ජ් හෙඩ්ලි, එවර්ටන් වීක්ස්, බැරී රිචර්ඩ්ස්, ග්‍රහැම් පොලොක්, වොලී හැමන්ඩ්, සර් ජැක් හොබ්ස්, සර් ලෙන් හට්න්, ඩෙනිස් කොම්ප්ටන්...ලයිස්තුව තව දිගට යන්න පුලුවන්..ඔවුන් හැමෝම දළ වශයෙන් සමාන හැකියාවන් , දක්ෂකම් තිබූ අය.ඔබ කැමති වෙන්නේ නැහැ ඔවුන් අතරින් දක්ෂයා තෝරන්න.නමුත් මට සහතික වශයෙන් කිව හැකියි මා දුටු හොඳම ක්‍රිකට් ක්‍රීඩකයා, තුන් ඉරියවු දක්ෂයා , ගැරී සෝබර්ස් බව. මම හිතනවා විවාදයකින් තොරව ඔහු තමයි මා දුටු විශිෂ්ඨතම ක්‍රිකට් ක්‍රීඩකයා.

රේ: ඔබෙන් පසු පැමිණි නවකයන්ට "මී ලඟ බ්‍රැඩ්මන්" කියන ලේබලය ඇලවෙන විට ඔබට ඔවුන් ගැන අනුකම්පා සහගත බවක් දැනුනා ද?

දොන්: ඔව්. මට ඔවුන් ගැන අනුකම්පාවක් ඇති වුනා. එය ඔවුන්ට අනවශ්‍ය පීඩනයක් වුනා. නිවු සවුත්වේල්ස් වල නෝමන් ඔනීල් තමයි එ බඳු පළමු වැන්නා.ඔහු හොඳ පිතිකරුවෙක්. නමුත් මේ ලේබලය ඔහුට අමතර බරක් වුනා.

රේ: හොඳයි..අවසාන ලෝක කුසලානයට ක්‍රීඩා කළ දක්ෂයන් ගැන කථා කලොත්, බ්‍රයන් ලාරා...ඔහු කොපමන දක්ෂයෙක් ද?

දොන්: බ්‍රයන් ලාරා සහ ටෙන්ඩුල්කාර් වන්නට ඕන වර්තමානයේ සිටින දක්ෂතම පිතිකරුවන් දෙදෙනා. දෙදෙනාගෙන් වඩා ශූර කවුද කියන එක තීරණය කරන්න අපහසුයි.ටෙන්ඩුල්කාර් ගේ තාක්ෂණය ඉහලයි..ලාරා ටිකක් වැඩිපුර ආක්‍රමණශීලීයි. ඔහු ටෙන්ඩුල්කාට වඩා අවදානමක් ගන්නවා.නමුත් ඒ හා සමානවම ලකුණුත් රැස් කරනවා. ඕස්ට්‍රේලියානුවන් අතරින් ස්ටීවන් හා මාර්ක් වෝ සහෝදරයන් ඉතා හොඳින් ක්‍රීඩා කර තිබෙනවා.මේ මට්ටමේ දී ක්‍රීඩකයන් ගේ දක්ෂතා අතර ඉතා කුඩා වෙනසක් පමනයි ඇත්තේ. ඒ නිසා අහවලාට වඩා අහවලා හොඳයි කියන්න හරිම අපහසුයි.

රේ: ඔබේ පලමු පිත්ත ගැන ඇති කතාව අහන්න කැමතියි..එය ඔබට ලැබුන අයුරු?

දොන්: ඔව්..එය කණ්ඩායෙමේ ක්‍රීඩකයෙකු ගේ පිත්තක්.තරඟයක දී ඔහු අතින් එය බිඳුන පසු..මට දුන්නා.වඩු බාසුන්නැහේ කෙනෙක් වූ මගේ පියා එය පිලිසකර කර මට දුන්නා..එය අපූරු පිත්තක්..මම එයට බොහෝ ඇලුම් කලා

රේ: එම පිත්තෙන් ඔබ ශතකයක් ලබා ගත්තා ද ?

දොන්: නැහැ..මම එයින් ශතකයක් වාර්තාකර නැහැ.

රේ: ඔබ ශතකයක් ලබා ගත්තොත් ..අළුත් පිත්තක් ගෙනවිත් දෙන්නට මව පොරොන්දු වුනා ?

දොන්:අවසන් තරඟයේ ශතකයක් ගත්තොත් පිත්තක් අරන් දෙන්න අම්ම පොරොන්දු වුනා..මම ලකුණු 300 ලබා ගත් නිසා මම කිවුව මට පිති තුනක් අරන් දෙන්න කියල..අම්ම ඒ සෙල්ලමට කැමති වුනේ නැහැ ( සිනහසෙයි )

රේ: ඔබ වික්ටර් ට්‍රම්පර් හෝ ස්ටැන් මැක්කැබේ තරම් සම්භාව්‍ය (classical) නැහැ කියා විචාරකයන් කියන කතාවට ඔබ එකඟ ද ?

දොන්: ම්ම්ම්..මට හිතෙන්නෙ ඔබ ක්‍රීඩා කරන ශෛලියට ලකුණු දෙන එකම ක්‍රීඩාව ක්‍රිකට්.

රේ: ලකුණු පුවරුව නොසලකා ?

දොන්: ඔබ ගොල්ෆ් ක්‍රීඩා කරන විට අඩුම ලකුණු ලබන්නා දිනුම්..ටෙනිස් වලදි තරඟය දිනන්නා..ඔබ ඔහුගෙ ශෛලිය ගැන වද වෙන්නෙ නැහැ.මට වඩා දැකුම්කලු ලෙස ක්‍රීඩා කල බොහෝ දෙනෙක් සිටියා..නමුත් අවසානයේ වැඩිම ලකුණු රැස් කර තරඟය දිනවන්නා තමයි වැදගත්.

රේ: ඔබ එය හරි පහසු දෙයක් ලෙස පෙන්නුවා..

දොන්: ම්ම්..නැහැ..මම දන්නෙ නැහැ මම එහෙම කලා ද කියල..

රේ: මාව විශ්වාශ කරන්න ..ඔබ එය කලා.

දොන්: (සිනහසෙයි )

රේ: එය පහසු වුනා ද ? ඔබට ස්වාභාවිකවම පැමිනි දෙයක් ද එය ?

දොන්: ආ..ඔව් බොහෝ විට..නමුත් සමහර අවස්ථා වල එය සෑහෙන්න අපහසු වුනා.

රේ: මොන වගේ අවස්ථාවල ද ?

දොන්: උදාහරණයකට ...පරණ වූ විකට්ටුවක ...ක්ලැරී ග්‍රිමට් වැනි දක්ෂ දඟ පන්දු යවන්නෙක් පන්දු යවන විට..මම එවැනි අවස්ථා කිහිපයකට මුහුණ දුන්නා ග්‍රිමට් සහ බිල් ඔරෙලි සමඟ...පසු කාලයේ ඇලෙක් බෙඩ්සර් මට සෑහෙන්න තර්ජනයක් එල්ල කලා.

රේ: ඔබ මුහුණ දුන් හොඳම පන්දු යවන්නා ලෙස ඔරෙලි සැලකුවා ?

දොන්: මා දැක ඇති සහ මුහුන දී ඇති හොඳම පන්දු යවන්නා ඔහු.

රේ: දොන්..කොළ සහ රන් පැහැය ( ඕස්ට්‍රේලියානු වර්ණ ) පැළඳීම ඔබට කෙලෙසද දැනුනේ ?

දොන්:සත්තකින්ම මට ලොකු ආඩම්බරයක් දැනුනා.ඕනෑම අයෙකුට තම රට නියෝජනය කිරීම ආඩම්බරයක්. ක්‍රිකට්, ෆුට් බෝල් ඒ කුමක් වුවත් ඔබ ඒ ගැන ආඩම්බර විය යුතුයි. මන් ද ඔබ වෙනුවෙන් ක්‍රීඩා කිරීමට වඩා රට වෙනුවෙන් ක්‍රීඩා කිරීම අතිශයින් වැදගත් නිසා.

රේ: එය ද ඔබේ ජීවිතයේ මංසලකුණ ?

දොන්: අනිවාර්යයෙන්ම.මන් ද මගේ ලොකුම බලාපොරොත්තුව වුනේ රට වෙනුවෙන් ක්‍රීඩා කිරීම.කොළ පැහැ කබාය පැළඳීම.

රේ:වාර්ථා බිඳහෙලීමත් වැදගත් වුනා ද ?

දොන්: නැහැ නැහැ..ඒවා අහම්බෙන් සිදුවූ දේවල්.

රේ:සර් දොන්..ඔබ කියන්නට කැමති වෙනත් යමක් ඇත්ද ?

දොන්: ඔබ මෙය මගෙන් කලින් ඇසුවා..මම කිවුවා මට යමක් කියන්න ඇති බව..නමුත් මගේ මතකය ගැන මට විශ්වාස කිරීමට අපහසු නිසා මම එය ලියා ගත්තා..මට ඉඩ දෙන්න එය කියවන්න.

රේ: කරුණාකර කියවන්න.

දොන්: මෙය හැරිස් ස්වාමි විසින් කල ප්‍රකාශයක්. පැරණි යුගයේ සිටි හොඳම ක්‍රිකට් තානාපතිවරයා ලෙස බොහෝ දෙනා සලකන ඔහු, 1931 දී මිය ගියා. කෙන්ට් හා එංගලන්ත කණ්ඩායම් වල නායකත්වයත් බොම්බායේ ආණ්ඩුකාර ධූරයත් දැරූ ඔහු ඉන්දියාව තුල ක්‍රිකට් ගැන උනන්දුවක් ඇතිකිරීමට සෑහෙන්න මෙහෙයක් කලා.ඔහුගේ අසූවෙනි උපන්දිනය දා තමයි මේ ප්‍රකාශය කලේ.

"ක්‍රිකට් වලට ආදරය කිරීමෙන් ඔබ කරන්නේ යහපත් දෙයක්. මන්ද එය නරක දෙයක් ඇත්නම් එයින් නිදහස්, අගෞරවයට ලක්වන්නා වූ දෙයක් ඇත්නම්..අන් කවර ක්‍රීඩාවකටත් වඩ එයිනුත් නිදහස්.එය උනන්දුවෙන්, නිර්ලෝභීව සහ ආත්ම පරිත්‍යාගෙයෙන් ක්‍රීඩා කිරීම ම මනසට පාඩමකි.එහි පංති කාමරය දෙවියන්ගේ සුළඟ සහ හිරු එළියයි. මාගේ සොයුරනි එය හදා වඩා ගන්න.එවිට එය එයට යොමුවිය හැකි මිනිසුන් ආකර්ශණය කර ගනීවි. එය රැක බලා ගන්න පැමිණිය හැකි හැම උවදුරු වලින්..එවිට එය වැඩේවි සියලු මිනිසුන්ගේ යහපත උදෙසා... "

මෙය තමයි මගේ ප්‍රතිපත්තිය වුනේ.මම මෙය අන් හැමටම නිර්දේශ කරන්න කැමතියි..

රේ: සර් ඩොනල්ඩ් ඔබට බොහොම ස්තුතියි..එය එතරම් අපහසු සාකච්ඡාවක් වුනේ නැහැ නේද ?

දොන්: (සිනහසෙයි ) ඔව්..එය සෑහෙන්න අමාරු වුනා..

රේ: තව වසර දහයකින් අපි නැවත සාකච්ඡාවක් කරමු ද?

දොන්: ඔව්.මම ජීවත්ව සිටියොත්.

රේ: හොඳයි..ඔබට බොහොම ස්තූතියි

මතක පොතෙන්

1985..පළමු ටෙස්ට් තරඟාවලි ජය සමරමින්....
ඉන්දියාව සමඟ පැවති මෙම තරඟාවලියේ දෙවැනි තරඟය ජයගත් ශ්‍රී ලංකාව තම ප්‍රථම ටෙස්ට් ජය හා තරඟාවලි ජය ඉතිහාසයට එක් කරමින් ප්‍රීති වන අයුරු ..
(නායක දුලිප් මෙන්ඩිස්, සිදත් වෙත්තමුනි, රන්ජන් මඩුගල්ල, අසන්ත ඩි මෙල්, අර්ජුන රණතුංග සමඟ රෝයි ඩයස්)
ලකුණු පුවරුව





ලොව සිටි වේගවත්ම පන්දු යවන්නෙක් වූ ජෙෆ් තොම්සන් ....






කොදෙව් පිලේ සුප්‍රකට W තුන්කට්ටුව...
සර් ෆ්‍රරෑන්ක් වොරල්, ක්ලයිඩ් වොල්කොට් සහ එවර්ටන් වීක්ස්



ලොකු උනාට මම බය නෑ....ඩෙනිස් ලිලී සමඟ කළහයක පැටළුණු ජාවෙඩ් මියැන්ඩාඩ්..1981 පර්ත් හි දී..

මඩුගල්ලේ නම් වූ ඔහු

1987 වසරේ ශ්‍රී ලංකා ක්‍රිකට් වංශ කතාවේ තෙවැනි නායකයා ලෙස වරම් ලැබූ රන්ජන් සෙනරත් මඩුගල්ලේ සීත කඳුකරයේ අගනුවර වන් මහනුවර දී 1958 අප්‍රේල් 22 වන දින උපත ලැබුවේ සහෝදරියන් දෙදෙනෙකුගෙන් යුතු පවුලේ එකම පුත්‍රයා ලෙසිනි.
මහනුවර ත්‍රිත්ව විද්‍යාලයෙන් ඉගනීම ඇරඹූ රන්ජන් පාසැලේ වයස අවුරුදු 11 න් පහළ හා 13 න් පහළ කණ්ඩායම් වල ක්‍රීඩා කරමින් ක්‍රිකට් ක්‍රීඩාවට අත් පොත තැබුවා.පසුව කොළඹ රාජකීය විද්‍යාලයට ඇතුල් වූ රන්ජන් ගේ ක්‍රිකට් ජීවිතයේ වැදගත් සංධිස්ථානයක් සනිටුහන් කරමින් යන්තම් වයස අවුරුදු 15 ගෙවී යද්දීම පාසැලේ පළමු පෙළ කණ්ඩායමට සුදුසුකම් ලැබුවා.
මුල් යුගයේ පිට දඟ පන්දු යවන්නෙකු ලෙස දස්කම් දැක්වූ රන්ජන් ගේ පන්දු රැකීමත් සැලකිය යුතු මට්ටමක තිබුනා. 1974/75 තරඟවාර යේ තරඟ 12 ක දී කඩුලු 32 ලබා ගත් ඔහු ගේ පිති හරඹ යේ දස්කම් මතු වන්නේ 1975/76 වසර වලදී. තරඟ 14 ක දී ලකුණු 351 ලබාගත් රන්ජන් 76/77 තරඟ වාරයේ දී ඔහුගේ පලමු ශතකය වාර්තා කලේ තරඟ 14 කදී රැස් කල ලකුණු 800 ක් සමඟින්. කඩුලු 33 කින් එම වසර සරසන්නත් ඔහුට හැකි වුනා.
සිවුවන වසර වර්ණලාභියෙකු ලෙස 1977 වසරේ දී රාජකීය කණ්ඩායෙමේ නායකත්වයට පත් වූ රන්ජන් 78/79 වාරයේත් නායකත්වයට පත්වූ යේ දෙවරක් එම වාසනාව ලද දෙවැනි ක්‍රීඩකයා ලෙසින්. ශතක 4 හා අර්ධ ශතක 9 සමඟ 78/79 වසර වල ඔහු ලකුණු 1175 රැස් කරමින් දැක්වූ දස්කම් 1979 වසරේ එංගලන්තය බලා ගිය කණ්ඩායමට එක් වීමේ මාවත විවර කළා. ටෙස්ට් වරම් නොලද රටවල් අතර ප්‍රමුඛම කණ්ඩායම බවට ශ්‍රී ලංකාව පත්වූ මේ සංචාරයේ දී රන්ජන්ගේ පන්දු රැකීමේ දස්කම් කැපී පෙනුනා.
ශ්‍රී ලංකාවට ටෙස්ට් වරම් හිමි වූ පසු මංගල සංචාරයට මෙහි පැමිනියේ ප්‍රබල එංගලන්ත කණ්ඩායමයි. ඔවුන් හා පැවති පළමු තුන් දින තරඟය පැවැත් වුනේ අස්ගිරිය ක්‍රීඩාංගනයේ දී 1982 වසරේ දී. පළමුව පන්දුවට පහර දී ලකුණු 33ට කඩුලු තුනක් බිඳී අසරණ වූ සභාපති ගේ පිල වෙනුවෙන් රන්ජන් රැස් කල ලකුණු 142 ඔහුගේ සටන්කාමී බවට හොඳ උදාහරනයක්. සරවනමුත්තු පිටියේ පැවති මංගල ටෙස්ට් තරඟයෙන් ටෙස්ට් වරම් දිනා ගත් රන්ජන් පළමු ඉණිමේ රැස්කල ලකුණු 65 ශ්‍රී ලංකා පිතිකරුවකු පළමු ඉණිමේ ලබා ගත් වැඩිම ලකුණු සංඛ්‍යාවයි.
ඒ තැන් පටන් කණ්ඩායෙම් නිත්‍ය සාමාජිකයෙක් වූ රන්ජන් ගේ තරඟ දිවිය ටෙස්ට් තරඟ 21 ක් හා එක් දින තරඟ 63 කට සීමා වුවත්, පුරෝගාමී ලාංකික ක්‍රීඩකයන් අතර ඔහු නොමැකෙන චරිතයක්. ටෙස්ට් තරඟ දෙකක දී පමනක් නායකත්වය දැරූ රන්ජන් 1988 වසරේ තම අවසන් ටෙස්ට් තරඟයට ක්‍රීඩා කලේත් එංගලන්තය සමගින්මයි..ඒ ලෝඩ්ස් පිටියේ දී.

පසු කාලයේ දී තරඟ තීරකවරයෙක් ලෙස ක්‍රීඩාවට තම දායකත්වය දැක්වූ රන්ජන් 2001 වසරේ දී ජාත්‍යන්තර ක්‍රිකට් කවුන්සිලයේ පලමු ප්‍රධාන තරඟ තීරකවරයා ලෙස පත් වන්නේ ඔහුගේ සැහැල්ලු මහත්මා ගතිගුණත් ක්‍රීඩාවේ ආචාරධර්ම රැකීම පිළිබඳ ඇති නොනැමෙනසුළු ප්‍රතිපත්තිත් නිසා වෙනි.
ජාත්‍යන්තර ක්‍රිකට් ප්‍රජාවේ නොමඳ ගෞරවයට ලක් වූ රන්ජන් අභිමානවත් ලංකා පුත්‍රයෙකි..

"පලා පැහැය ඇතිරුන කඳුගැට අතර හිරු සැඟවෙන්නට ලං වෙද්දී..මිටි පඳුරු වලට මායිම් වූ තණ පිටියේ කෙලවරක සිට දිව අවුත් කිරිකොක් සුදෙන් සැරසුන වංශාධිපතියා අපූරු ඉරියවුවක් මවා අතහැරි පන්දුවට අනෙක් අන්තයේ සිටි ගම්පතියා වක් හැඩති පිත්තකින් එල්ලකල මනරම් පහර, පන්දුව ගෙන ගොස් අසල පිහිටි සිඟිති පොකුණක අත හැරියේ පිටිය කොනක සුරතල් වෙන මනාව සැරසුන කුල අඟනන් ගේ අත්පොලසන් හඬ මැදිනි."

දහසය වැනි ශත වර්ශයේ දිනක එංගලන්තයේ ගම්බද පෙදෙසක මේ බඳු දසුනක් මැවූ ඒ මනරම් ක්‍රීඩාව මහත්වරුන් ගේ ක්‍රීඩාව ලෙස පතලව නෝනා වරුත් අද පිටිය මැදට ගෙන එන ක්‍රිකට් නමින් පතල ව ඇත.
ලොව දහසකුත් එකක් ක්‍රීඩා ඇතත් අප වැනි රසිකයන්ට නම් ක්‍රිකට් යනු ක්‍රීඩාවක් පමනක් නොව කලාවකි. අන් කවර ක්‍රීඩාවකටත් වඩා විවිධත්වයෙ න් පිරුන සංකීර්ණ තරඟයෙන් තරඟයට මැවෙන සිතුවමකි.
එවන් අපූරු ක්‍රිකට් ගැන කඩුල්ල මුවා නොකර කතා කරමු බොහෝ දේ...

හයේ හයක්...